仲咩咁睇唔開搬入大嶼山 – 序

即將搬入大嶼山,身邊朋友大多很詫異,彷彿我做了一個很錯的決定。最關心的就是「你要用幾多個鐘返工」及「你平時會食/玩D咩」。

於是很想開一個column,專講搬入大嶼山/在大嶼山生活的種種,以至一些連帶的生活觀察與離記。


首先想講,新界人與九龍/港島人完全是兩種不能溝通的生物。我列舉一下:

一) 新界人守時,九龍/港島人遲到當食生菜

根據我的不完全觀察,由中學到大學到出來做野,每逢約食飯開會,新界人(例如住上水、粉嶺、大埔、天水圍、元朗、屯門)的朋友大抵都會好準時,因為火車/西鐵/巴士的班次很固定,新界人多年的居住經驗,出門的預算大多計算了等巴士/火車延誤(你有試過因直通車在沙田站delay十分鐘嗎)的時間,所以會準時;九龍/港島人習慣最後一刻才出門口,依賴香港公共交通工具的極度有效率,往往喺預左遲十五分鐘,假如有任何一個環節(例如哎呀咁啱miss咗架巴士添)出錯,少則遲半小時(會當無事發生),可能要遲一小時先會出個Whatsapp。

所以,住慣九龍/港島的人,與住慣新界的人,時間觀念的差異,就有如利物浦與曼聯的距離,下世都唔會溝通得到。

二) 新界人一星期只做到一件事,九龍港島人一晚就有幾單節目

由以上的時間觀念可以衍生出更多的例子。例如遊行。新界人去遊行,是一件非常嚴肅的事,一個美好的星期天下午,不去踢波行山拍拖打機上深圳飲喜茶,而用三個鐘頭到港島遊行,肯肯定付出很多,一個應該抵三個,哪兒有九龍/港島人的閒情逸致,早上先做個gym再下午與家人飲茶然後施施然三點半在維園插隊散步兩小時?平日就更加唔駛講,新界人放工去睇戲,返到家都十一點,除非做量地官,否則一般都係星期六日先去 (同理,睇戲對於新界人都係一件非常嚴肅的事)

如果用經濟學概念,就喺新界人做任何事的機會成本,都比九龍/港島人高兩三倍,亦即喺話,同樣一件事 (例如拍拖送人返屋企),新界人可以創造嘅邊際效益 (如果送多幾次返屋企喺代表更高嘅愛意),比起九龍/港島人高好很多。

所以,點解我咁難得呢幾年做到港島人,點解會咁傻豬豬搬入去大嶼山?香港樓價喺咪貴到一個點,一定要搬去一小時生活圈以外的地方?咁就留待下回分解。

發表迴響